Уражанні ад Талькаўскага фэста - 2010

Сёлета свята рыхтавалася разам з Талькаўскім клубам. Адзінай умовай сумеснага правядзення мерапрыемства ля клуба была просьба яго работнікаў "не называць мерапрыемства фэстам". Сышліся на назве "Свята музыкі і паэзіі". Абвесткі была развешаныя ў Тальцы за 3 тыдні да свята, сталі рэпеціраваць з дзецьмі народныя песні і танцы. Узнікла спадзяванне, што мінулагоднія забароны - гэта ўсяго толькі ініцыятыва былога старшыні Талькаўскага сельсавета Палазніка С. М., якога людзі не абралі больш дэпутатам у красавіку 2010 года. Але 1 кастрычніка, у пятніцу, мне патэлефанавала мастацкі кіраўнік клуба Вінтэр Маргарыта Віктараўна і сказала, што яны атрымалі ад свайго кіраўніцтва загад: клуба ў нядзелю 3 кастрычніка не адчыняць, мерапрыемства не праводзіць. Так што мы апынуліся зноў у такім жа становішчы, як і ў папярэднія 3 гады - мерапрыемства не дазволенае, трэба ісці ў лес. Палазніка няма, але справа яго жыве. Сістэме не патрэбны Талькаўскі фэст, не патрэбна ніякая ініцыятыва знізу, яна баіцца і ненавідзіць усё, што робіцца не па яе загаду, нават такія нявінныя і зусім апалітычныя рэчы, як беларускія песні, вершы, танцы і гульні.

Значыць, "месца сустрэчы змяніць нельга" - Коласава паляна за Тальлю.

Сёлета разынкай нашага свята стаў удзел Адася Матафонава і Тамаша Сідаровіча з прэзентацыяй "Дзіцячага альбома". Славуты музыка Зміцер Сідаровіч і спявачка Таццяна Матафонава разам са сваімі дзецьмі зрабілі гэты цікавы праект, альбом толькі што выйшаў, таму аўтары ласкава прынялі нашу прапанову прэзентаваць яго ў Тальцы. Зміцер расказаў пра альбом, усе жадаючыя змаглі яго набыць у аўтараў. Каштоўнасць праекта яшчэ і ў тым, што дыск змяшчае тэксты песень, ноты і фанаграмы без голасу. Так што любы жадаючы можа вывучыць гэтыя песенькі. Мы пачулі ў выкананні квартэта Матафонавых-Сідаровічаў некалькі беларускіх народных дзіцячых песень: "Сонейка", "Дзядок рыбачку злавіў", "Ай, куры-куры", "Ту-лю-лю", "Гэй ты, воўчанька". Асабіста для мяне гэтыя песні былі поўным адкрыццём, я ніколі іх не чула. Ёсць на дыску і больш вядомыя фальклорныя творы: "Кура-шчабятура", "Цяцерка", "Ехаў мазур да млына", "Баю-баю". Дыск будзе цікавы бацькам, хто хоча навучыць сваіх дзяцей і сам мае патрэбу навучыцца беларускім народным песням, выкладчыкам музыкі - дыск стане выдатным дапаможнікам у іх справах.

Зміцер Сідаровіч расказвае пра "Дзіцячы альбом"

квартэт Матафонавых-Сідаровічаў прэзентуюць песні з "Дзіцячага альбома"

спявае Таццяна Матафонава

Некалькі сваіх новых песень праспявала Таццяна Беланогая. Мы ўжо чулі яе ў пазамінулым годзе на нашым свяце, уражанні і тады і цяпер - самыя найлепшыя, яе песні ні з чыімі не зблытаеш, ды і манера спеваў вельмі адметная. "Высокае мастацтва" - сказала мая суседка па "глядзельнай зале" пра песні Таццяны і я з ёю цалкам згодна.

Яшчэ адна Таццяна Барысік - прыехала да нас з Магілёва. Гэта наша пастаянная госця: за ўсе гады існавання фэсту Таццяна ніводнага разу не прапусціла яго. Яе дар надзвычай рэдкі: бачыць смешнае там, дзе звычайныя людзі бачаць толькі паўсядзённасць ці ўбоства. Таццяна піша іранічныя і саркастычныя апавяданні і вершы, умее "падслухоўваць" у размовах беларусаў анекдоты. Яе выступленні заўсёды суправаджаюцца смехам слухачоў, праўда, бывае, што смех гэты горкі, "праз слёзы". Таленавітая літаратарка мае некалькі тоўстых сшыткаў сваіх твораў, хочацца пажадаць ёй у хуткім часе займець уласную кніжку, а пакуль што некаторыя з гэтых твораў можна прачытаць толькі ў газеце "Наша Ніва" і пачуць на радыё "Свабода".

выступаюць Таццяна Барысік і Ігар Сімбіроў

Сёлета з паэтычнага аб'яднання "Мар'інка", што дзейнічае пры раённай газеце "Пухавіцкія навіны", прыехалі Уладзімір Рунцэвіч, Эдуард Білейчык і Яўген Фіцнер. Гэта непрафесійныя паэты, але вершы іх надзвычай прафесійныя, глыбокія. Рунцэвіч мае ўжо некалькі паэтычных зборнікаў вершаў і баек, часта друкуецца ў "Пухавіцкіх навінах", агульнабеларускіх газетах, пры гэтым працуе рабочым льнозавода ў Мар'інай Горцы, просты, сціплы чалавек, не набыў ніякіх сімптомаў "зорнай хваробы". Спадар Эдуард яшчэ піша і музыку да сваіх вершаў і спявае свае творы пад гармонік. Цяпер ён жыве і працуе ў Мінску, але не забывае Пухавіччыну, сваю родную вёску Вераб'ёўку. Шкада, што мала было выдзелена часу для гэтых паэтаў на свяце.

Эдуард Білейчык выконвае свае творы пад гармонік

выступае Андрэй Мельнікаў

Яшчэ адзін паэт - Віталь Быль - зусім малады чалавек, студэнт гістарычнага факультэта прыехаў да нас другі раз. Яго новыя вершы парадаксальныя, іранічныя, незвычайныя - таленавітыя. Душа радуецца, калі бачыш і чуеш такую моладзь, тады верыцца, што ўсё ў нас атрымаецца. Пацешылі спевамі народных песень Юлія Ліцьвінава і Раман Яраш - "Кацілася зорка па небу", "Ой ляцеў воран да з чужых краёў" і іншыя малавядомыя (для мяне, ў прыватнасці ), сапраўды народныя творы прагучалі ў выкананні гэтага інтэлігентнага дуэта.

Наталля і Вадзім сёлета прыехалі са сваёй маленькай дачушкай Завеяй

Ганна Чумакова, Раман Абрамчук, Ігар Сімбіроў, Аляксей Жораў, Таццяна Матафонава, Зміцер Сідаровіч, Аляксей Галіч, Андрэй Мельнікаў спявалі свае ўласныя, народныя і аўтарскія творы.

спявае Ганна Чумакова

выступае Андрэй Мельнікаў

Слухаючы іх, забываеш пра тыя забароны і перашкоды, што чынілі нашаму святу некаторыя людзі пры пасадах, радуешся прыгажосці, таленавітасці гэтых людзей і чакаеш ... новых сустрэчаў.

не ўсе талькаўскія вожыкі ў кастрычніку ўжо паснулі

уверх